Upu Tomua

Mapu ia i le too ae lepa i le foe, e pei o le fetalaiga ia Manono. Ua matie ai nei le tiasa Ua laga foi le galu fuliafa. E ae i le ti ae ifo i le nonu, ia malu vai o lo outou agatonu. Lau o le fiso ma lau o le tolo. E ala e tasi le mauga i Olo. O paia o Samoa, nuunuu faatini o Tausala i Faleupolu o tofiga aua o le latou matafaioi lea. Ae o mamalu feaveai o le atunuu ua nofo fale ia Satuiamaa. I le mamalu i faafeagaiga taulagi o loo latou asuina le vai o le ola i fatafaitaulaga e fia o le atunuu, Tulou. O Tama ma Tina ua loa le soifua, e oo i e pito itiiti, ae maise alo ma fanau a le atunuu o tautuaina le malo, Faatalofa. Ua sanisani faamanuao i le vaveao, ae vivini moa o le taeao aua ua patilima laau o le vao.
E viia pea le Atua i lana pule faasoifua ua aulia mai ai lenei itula o maualuga pea le aoina o le masina. Tulou tulou Lava.
O le uluai tusitusiga lenei atonu o le a tele nisi o tusitusiga ma ni mafaufauga se tele o i luma. O lenei lomiga o le a faatatau i le feofoofoaiga ma fetufaina o mafaufau i mataupu eseese i le aganuu, agaifanua aemaise mataupu o loo tupu mai pea i lea aso ma lea aso.

Afai ae le soo sou titi, pe a'u sou pale. O moomooga alofa lava, ina ia uumau lau aganuu e te laei ai. Finagalo malie ona ua pau o se taumafaiga le auau a le auauna. Alofa le Atua ia faafualoaina lo outou soifua ma ia mamao ni gasegase.
A iai se aleu, poo se peau lagavale, o oe lava o le Matua faitama oute malu ai. E poto lava le Tautai ae se lana atu i ama. .
E faatofa faasoifuaina lau faasausauga.