Head of State of Samoa Speech, National University of Samoa

Lauga: Faauuga e avea ma faa-Ao o le Iunivesite o Samoa
Tui Atua Tupua Tamasese Ta’isi Efi
Ao o le Malo, Samoa
Vailele, Samoa
20 March 2008

Fai mai o le atua sa faitaulaga i ai le itumalo o Atua i aso la ae le’i taunuu mai le Tala Lelei o
Tupualegase, o le paneta o loo alala i le lagi. O le uiga o le upu “tupua” o tupua e taumate,
tauiso, tau’ite’ite, faailogafesili. O le uiga o le “le gase” e tumau, e le gase, e faaauau se’ia oo
i le faavavau. O lona uiga, o le moni, o le alofa, o le amiotonu o le Atua, o le fesili e taumate
e le tagata.

O le uiga tonu o le upu “tofa sa’ili”, o le tau sa’ili, tauiso, tau’ite’ite, taumate le fesili o le
“tupualegase”.

Ma afai o le Atua o le tupualegase, ua ou lagona ua mafuta mai le Atua ma i tatou i le aso
lenei. Aua mo a’u, atonu fo’i e faapea mo nisi tagata, ua taumate i le ‘ete le tupualegase.

Sa ou fesili ia Auseuga le failautusi o le Malo, “O le a tonu a le uiga o le faa-Ao o le
Iunivesite o Samoa, a o le a lana fe’au faatino?” Tali Auseuga, “’Aua e te popole Tupua, o
lea o le a aga’i mai le savali a le Iunivesite. Ma o i latou tonu ia o le a e maua ai le tali o lau
fesili.”

Ona oo atu lea o le savali a le Iunivesite. Faatu atu le fesili, “O le a tonu a le uiga o le faa-Ao
a le Iunivesite o Samoa, a o le a lana fe’au faatino?” Ae fai mai le tali, “E te le maua ia
matou le tali, aua fo’i fai mai le Tulafono, o le Palemia ma le Kapeneta e togia ma tofia le
faa-Ao o le Iunivesite. Ma e ono mafai e le Palemia ma le Kapeneta ona tofia le Ao o le
Malo e avea ma faa-Ao o le Iunivesite mo le lima (5) tausaga. O lona uiga, vagana le
Palemia ma le Kapeneta e mafai ona faamatala atu pe mafua isea ona togia ma tofia oe o le
faa-Ao o le Iunivesite.”

Ona toe oo atu fo’i lea o Auseuga, o le Soo’upu a le Palemia ma le Kapeneta, ona ou toe fai
fo’i lea iai: “Se’i e alofa e le’i maua lava se tali o le fesili, o le a tonu le uiga o le faa-Ao a o
lea fo’i lana fe’au faatino? ‘Aua e te poi, afai lava ua na o se teu fugalaau po ua na o se
2

faalupega, ‘aua e te popole e le pe lo’u fatu, ona o a’u o le tamaloa Atua e taumateina le
tupualegase.

I le afiafi ananafi, na taunuu atu ai se faamalamalamaga mai le Sui Soo’upu o le Palemia ma
le Kapeneta. Ua na o se kopi o le Tulafono e faamatala ai le matafaioi a le Palemia ma le
Kapeneta e tofia le faa-Ao o le Iunivesite ma le avanoa e tofia e le Palemia ma le Kapeneta le
Ao o le Malo i lenei tofiga.

Afai la ua le maua se tali o le fesili mai le Ofisa o le Palemia ma le Kapeneta poo mai le
Iunivesite, malilie la, o lea o le a faaauau le ‘anava a Atua e tauiso le tupualegase.

Ona ua siliga i le Ofisa o le Palemia ma le Kapeneta ma le Iunivesite o Samoa, o lea o le a ou
silisili i le tuugamau.

Tula’i mai Tofilau Eti Alesana, o oe lea sa ta fai’upu i le Iunivesite lenei. Masalo ua e faapea
nei, “Ua la Tupua, o lea ua e faa-Ao nei i le Iunivesite; a o fea fo’i lou faatuu’ala?” O la’u
tali, “O le faavae lea o le tofa sa’ili. Tatou te taumate le tupualegase. O le uiga lea o upu, ‘o
le tofa fetala’i’. Ua toe fuata’i le taeao; o le aso ma le filiga, o le aso ma le mata’igatila; o
le fuata ma lona lou.”

I lenei aso o le tofa fetala’i, o le aso o le filiga ma le tofa sa’ili, ua ou toe silisili i la’u uo i le
faasinoala. Fai mai Tofilau, “E mafua ona faatu le Iunivesite lenei, ona e avanoa ai ona
faataua le gagana, le tala faasolopito ma tala o le vavau, le tu ma le aganuu a Samoa, le mau a
Samoa. E le mafai ona ave le faamuamua i mea nei pe afai e pule’esea pe pule faaluafesasi.”

Afai o le tofa alualu mamao lea o loo limata’ita’iina ai le fe’au a le Iunivesite, e mafai ona ou
faapea atu, afai ua ou sala i la’u faatuu’ala, ae o lo ua fai ma o loo faaauau pea la’u galuega
togisala aua o loo faamaonia i faamaumauga a le Iunivesite, ua fai la’u sao i le gagana
Samoa, i le tala faasolopito, le tala o le vavau, le tu ma le aga ma le mau a Samoa – fai mai a
Tofilau o mafuaaga ia na faatu ai le Iunivesite lenei.

I le televave o suiga o le olaga, e foliga mai o le fesili tausisi, pe iai se aoga o le gagana
Samoa, o le tala faasolopito, o tala o le vavau, o le tu ma le aga ma le mau a Samoa. Pe iai se
aoga o le faasinomaga, o le tofi, o le matafaioi? Ma o le lu’itau i le tofa sa’ili e ono
faa’upuina faapenei. Muamua, ia sa’ili ma faamautuina le alofa, le amiotonu ma le filemu o
3

le Atua o loo i totonu o le mau a Samoa. Lua, a maua, ona momoli mai lea e fai ma faavae e
limata’ita’iina ai le fe’au a a’oga ma faia’oga, le fe’au a pulegamalo ma le fe’au a e faafoeina
le Tulafono.

Ae o le faavae o lenei tofa sa’ili o se galuega faaauau, e sa’ili ma toe sa’ili; aua e le mafai
ona aofa’i e le poto o le tagata le tofa a le Atua. Afai sa ou lape i le vaitaimi ua tuana’i, toe
fuata’i i lenei taimi. E le mafai ona tamau se tulafono, pe fuaao faapea o le moni ma le atoa o
loo sili i lo’u taliga poo taga i lo’u ‘ie. O le Atua o le tupualegase, o la tatou matafaioi o le
sa’ili pea o le moni o le Atua ma lo tatou iloa mautinoa, e iai suiga e aliali mai e ao ona
fetala’i ai le mafaufau ma toe fuata’i ma faafouina.

Fai mai le upu, e matuaoti le puapuaga ma le tuavale. O lona uiga, e leai se isi e fia
faasalalau o a’u o le tina po o le tama o le puapuaga po o le tuavale.

Ae le masino matua o mea e tualelei. ‘Aua tatou te te’ite’ivale pe faasea pe a finau o ai na
faafailele, o ai na fofoaina le Iunivesite lenei? Aua o se tasi lea o molimau, o le tualelei. Ia
atonu e mafai fo’i ona ou pasese ai. A faapea ane se isi, aisea ua faa-Ao ai Tupua i le
Iunivesite? Aua o se tasi lena molimau o le tualelei. Afai fo’i sa talitonugata se taofi i fatia
ua alu, o aga lava na o le tofa sa’ili.

Ona ua le maua se tali o le fesili, o le a le uiga a o lea le fe’au? Ia o lea o le a ou fai atua le
tali. E le taua ia te a’u o le faa-Ao ua na oe se faalupega. E le taua ia te a’u o le faa-Ao ua na
o se teufugalaau. Ae taua ia te a’u, ia avea a’u o se auauna aoga.

Ona ou manatua ai lea o le faasea a se tasi o lo’u aiga, “Se Tupua tuu lena ofutino pa’epa’e
ona e foliga ai oe o se waiter po o se auauna i se fale’aiga.” Ona ou fai atu lea, “E le afaina
lena mea, ae a fo’i la e fai mai le faalagiga o le Pope, ‘o le auauna o auauna’.”

Afai e iai sa’u auaunaga i e o loo auauna nei i le Iunivesite o Samoa, ona ou talitonu lea ua
‘anoa ma ganea lo’u tofi, o le faa-Ao o le Iunivesite o Samoa.
Soifua