Lauga Manumalo (Winning Speech)

O le lauga na manumalo i le tauvaga fa’apitoa na tu’ufa’atasia a le YWCA
Sunday, 26 October 2008 16:44
LAUGA

O Le Tiute O Tina Ma Tama’ita’i
O le ‘a ou le faloina le ‘afaloloa pe ou te toe si’i se matalalaga i paia ma mamalu, o sa ma faiga o le Komiti, aua o paia ma mamalu e tumau. Ae o le ‘a aga’i tonu se manatu i le autu filifilia o le lauga e faapea ‘O le taua o tamai’ita’i i faiga fa’aiuga i totonu o Samoa”.

E lua ni vaega ua on vaevaeina iai le autu.
1. O le taua o tama’ita’i?

- O so latou aoga po’o so latou sao; e ala ini tiute o latou faatinoina po’o ni matati’a o latou ausia latou te lagolagosia ai ile atina’e ina ole taou malo.
2. Fa’aiuga fai e totonu o Samoa.

- Oni tonu autu ia olo’o faia po’o fuafuaga fa’ataotooto mole lumana’i manuia o se si’osiomaga.
O tina and tama’ita’i e taua tele aua oi latou ua filiafilia ele Afua e avea ma fautua i totonu o so’o se fa’a lapotopotoga latou auai ai aua o lo latou leo e amanai’a e tagata e fai ma pae ma auli i so’o se si’osi’omaga, latou te faaleleia eseesega ma soloia faafitauli. O tina fo’i ma tama’ita’i ua mafai ona avea ma faauluuluga o fea’lapotopotoga ma matagaluega ale malo aua ua mafai ona latou ausia le tulaga maualuga ole ola a’oa’oina e mafai ai ona latou fa’atautai’a so’o se fa’aiuga latou te mautinoa e aga’i ai i luma le Atina’e ole malo o Samoa i so’o se itu.

O a’u, ou te talitonu i aia-tatau fa’avae ma le sa’olotoga o tagata, o tulaga mamalu ma le taua o le tagat soifua, o aia tutusa a le ali’i ma le tama’ita’i i tiute fai i so’o se si’osi’omaga o le soifuaga; pe se si’osi’omaga o se aiga, se nu’u, se mali se ekalesia po’o le a lava.

O si tatou atunu’u o Samoa, o le atunu’ tuto’atasi. Ma e ogatototu lana aganu’u ma ona talitonuga fa’a-kersiano i lona soifuaga o aso uma. E fa’amaonia lea i ana tu ma aga fa’aaloalo ma le va fealoa’i o tagat i so’o se li’o o se si’osi’omaga. Le aganu’u lea ma tu fa’a kerisano o lo’o fa’afailele ai le amana’ia o aia-tatau fa’avae ma le sa’olotoga o tagata pei ona ta’ua.

O le ala foi lea o lo’o fa’atauaina ai le Tulafono Fa’avae o le Malo o Samoa aia-tatau fa’avae ma sa’olotoga o tagata, aemaise le fa’amamafain o avanoa tutsa mo ona tagata-nu’u uma, pe se ali’i po’o se tama’ita’i. O i o lo’o fa’atauaina ai le aia-tatau a so’o se ali’i po’o se tama’ita’i i totonu o nu’u ma afioaga, aua o ia o le suli i le suaga matai atoa ma le fanua.

E matauina fo’ lea itu i tualaga tau a’oa’oga, lea e avanoa tutusa ai le ali’i ma le tama’ita’i. Fai mai nisi, o le 30 tausaga talu ai, sa seasea se tama’ita’i ona pale i se tulaga fa’auluulu i se matagaluega po’o se fa’alapotopotoga a le Malo, pei o se tofiga e fa’apitoa i ali’i ma e seasea se tama’ita’i ona ausia, vagan Fanaafi Ma’ia’i i le 1970 i le tulaga Fa’atonu Sili o le matagaluega o A’oga. Peita’i le vaitaimi lenei, ua le sa’o ai lena talitonuga. Aua ua to’atele tama’ita’i ua papale ma tutu i matagiolo e fai ma fa’aululuga o matagaluega ma fa’alapotopotoga a le Malo, ma nisi o fa’alapotopotoga ma kamupani i Samoa.

I le taimi nei, o lo’o avea ma fa’ululuga o le Komisi e PuleaGaluega ale Malo(PSC) se tama’ita’i. E fa’apena ai le matagaluega o Tina ma Tama’ita’i ma Aga Feso’ota’i (Ministry of Women Affairs), ole matagaluega o Tupe ale Malo(Minstry of Finance), ole Fa’alapotopotaga o Fale a Samoa(Samoa Housing Corporation), ole matagaluega ole Soifua Maloloina(Ministry of Health) ma isi matagaluega ma fa’alapotopotoga.

Ma ole fa’avaeina ole Matagaluega a Tina ma Tamai’ta’i ma Aga Feso’ota’i a Samoa, o se la’asaga taua tele lea o saga fa’amautuina ma fa’amalosia ai le tiute ma le sao taua o tina ma tama’ita’i, a leai se tina po’o ni tama’ita’i se aiga, se nu’u, se Ekalesia ma se Malo, ua le atoa le lelei o se aiga,se nu’u, se Ekalesia ma se Malo. Ae mafua mai i taua tele o le sao o Tina ma Tama’ita’i, ua misia i lo tataou si’osi’omaga i tiute faia mo le manuia o o tataou tagata.
Soifua

Saunia e Sanita Ioapo Taua’i
Kolisi o Samoa

Fa’ai’uga o le tauvaga lauga fa’a Samoa:
Tulaga muamua Sanita Ioapo
Tulaga lua Katie Asafo
Tulaga Tolu Peresia Mua
Vaisola Fuimaono
Mamaele Fonoti