Tui Atua Tupua Tamasese Efi, June 2009

LAUGA O LE SISIGAFU’A 2008

Afioga, Tui Atua Tupua Tamasese
Ao o le Malo o Samoa
2 June 2008
Tiafau, Mulinuu

E muai fia faia se faafetai faapitoa i le auai mai o le afioga a le Lutena Kovana o Amerika
Samoa ma le faletua, le Sui o le pulega a Tokelau ma le faletua, le Peresetene o le Senate
ma le Fofoga Fetalai o Amerika Samoa ma o la faletua, le alii Faipule o le Malo Tele o
Amerika, lau susuga Faleomavaega Eni Hunkin.

O le matua o la’u tautalaga: “tou te faia le mea nei, e fai ma faamanatuga ia te a’u”.

O le matua o la’u tautalaga: “tou te faia le mea nei, e fai ma faamanatuga ia te a’u”.

O le Sisigafu’a, o le faamanatuga.

O le faamanatuga o le alofa lē mavae o le Atua – o lea sa sula e le Ta’ita’i o le sauniga, le
susuga ia Tavita Roma.

O le faamanatuga o le soifua tausaafia o le susuga ia Malietoa Tanumafili le 2, Ao o le
Malo.

O le faamanatuga o le ola faitaulaga o mātua i le sa’iliga o malo. O le agaga faitaulaga e
faavae mai le mau a Samoa, a e mana’o i le pe’a talia tīgā, toe faamalosia e le mau a
Keriso, a e mana’o i le manumalo, talia le Satauro.

O le faamanatuga, po o ā tofotofoga sa feagai ma mātua, ae na taunuu manuia le sa’iliga
malo, ina ua ‘au’autasi tagata Samoa, i le agaga, i le mafaufau ma le sini o le
faamoemoe.
O le faamanatuga o le galuega tapua’i ma le galuega tatalo a Ekalesia mo le faiva o Malo
ma le lotoifale o aiga.

O le faamanatuga o le tele o galuega lelei a le Malo, Aufaigaluega a le Malo, ma
faipisinisi - o se tasi o foliga vaaia o le faafoeina o Taaloga Faa-va-o-malo i le Pasefika i
le tausaga na se’i mavae atu nei.

O le faamanatuga o le sao tāua a le Ofisa o Faamasinoga i le puipuiga o le Tulafono ma le
tausiga o le filemu.

O le faamanatuga o le lagolago ma le tautua Malo a tagatanuu o Samoa.

1
O le faamanatuga o ē agalelei mai iā i tatou, e lē gata i Malo ae faapea ai i
faalapotopotoga. Ia o tatou manatua e lē gata i la tatou faafetai i le upu ae faapea ai i le
faitatalo.

O se faamanatuga iā te a’u, ua leva ona faa’aaogagase outou aemaise le fanau a’oga; ma e
ao ona faapuupuu le lauga.

I le o lea, o le a taualuga le lauga. E lē sili atu le lauga o upu i lo le lauga o le amio. E lē
sili atu le lauga a a’u lea e fai atu, i lo le lauga lea ua faataunuu e outou, aemaise le fanau
i le taeao lenei. Le lauga o le faitaulaga, le ala i le vaveao, i le sauni mai i le Savali, i le
savali mai le Eleele Fou i Mulinuu, i le feagai ma le mugalā ae tainane uaga; aua i la tou
faitaulaga, ua outou soosoo tau’au ai ma le faitaulaga a mātua e māfua ai le aso lenei. Ma
o la tou faitaulaga, e ganea ai le tima’i a Keriso: “tou te faia le mea nei, e fai ma
faamanatuga iā te a’u”.

Talosia o le a avea mea tatou te faia ma tautala i ai i lenei aso, ma la’ei o la tatou
faamanatuga.

Soifua